#грошы #асабісты бюджэт #эканомія

Усё бліжэй зіма і навагоднія святы, а за імі 23 лютага, 8 сакавіка... Мы ўсе з нецярпеннем чакаем святочных дзён, каб адпачыць і сустрэцца з сябрамі і блізкімі. Але святы патрабуюць ад нас падрыхтоўкі, пэўнага часу і грошай. У гэтым артыкуле пагаворым пра фінансавыя аспекты падрыхтоўкі да святочных дат.

Плануем расходы на святы

 

Пасля святаў многія людзі заўважаюць, што іх грашовыя запасы істотна зменшыліся, некаторыя нават залазяць у даўгі, з якіх часам няпроста выбрацца. Каб пазбегнуць такіх "сюрпрызаў", важна навучыцца правільна планаваць свае фінансы на святы. Першы крок да паспяховага планавання бюджэту – вызначыць асноўныя святы і падзеі, якія патрабуюць выдаткаў. Самы просты спосаб – узяць каляндар на год і адзначыць у ім усе важныя даты – дні нараджэння блізкіх, сямейныя святы, юбілеі, вяселлі. Затым варта адзначыць традыцыйныя святы, такія як Новы год, 8 сакавіка, 23 лютага.

 

Потым трэба вырашыць, якія святы вы будзеце адзначаць, з якім размахам будзеце гэта рабіць і колькі грошай гатовы патраціць на кожнае з іх. У бюджэт трэба ўключыць меркаваныя расходы на падарункі і само святкаванне: падарожжа, арэнда рэстарана, пачастунак, святочную вопратку, паслугі цырульні і г.д.   

 

Адзначыўшы такім чынам святы, вы можаце ўбачыць памесячна, якія расходы спатрэбяцца. Пасля гэтага можна вызначыць бюджэт і адкладаць грошы адразу, або паступова. Можна нават адкласці грошы на асобную картку або рахунак, які будзе выкарыстоўвацца толькі для святочных расходаў. Гэта дапаможа вам кантраляваць свае траты. Таксама ўсталюйце максімальную суму, якую вы гатовы патраціць на кожнае свята, і прытрымлівайцеся гэтага ліміту. Будзьце рэалістычныя і не трацьце больш, чым можаце сабе дазволіць.

 

Шукаем месца для свята

 

Загадзя трэба шукаць і месца, у якім вы са сваімі блізкімі або калегамі будзеце адзначаць свята. Гэта, па-першае, выгадна, бо можна параўнаць цэны і выбраць установу па вашай кішэні. Па-другое, гэта дапаможа пазбегнуць пошуку ў ажыятажы, бо непасрэдна перад святамі застаецца мала свабодных месцаў, а цэны на арэнду могуць вырасці.

 

Пачніце са складання спісу гасцей. Важна ўлічваць колькасць запрошаных, каб правільна падабраць памяшканне, заказаць патрэбную колькасць сталоў і крэслаў. Таксама загадзя вызначыце меню і закупіце ўсё неабходнае, каб пазбегнуць мітусні ў дзень свята. Акрамя таго, варта ўлічваць расходы на ўпрыгожванне і афармленне памяшкання, а таксама выдаткі на забавы і вольны час у момант святаў.  

 

Арандуем кафэ

 

Арэнда кафэ або рэстарана да свята – гэта нятанна, таму пры браніраванні варта ўдакладніць наступныя моманты:

  • Памер авансу. Перадаплата можа дасягаць 50% ад агульнай сумы заказу.
  • Кошт арэнды залы. Некаторыя ўстановы спаганяюць плату за арэнду асобна, часам аплата нават пагадзінная. Даведайцеся пра ўмовы арэнды, каб пазбегнуць нечакана вялікага рахунку пасля мерапрыемства.
  •  Сярэдні кошт заказу на аднаго чалавека. Для розных урачыстасцяў могуць быць прапанаваныя розныя спецыяльныя пакеты, якія разлічаныя на розныя бюджэты.

 

Вызначаемся з бюджэтам

 

Пераканайцеся, што ваш бюджэт на кожнае свята рэалістычны і адпавядае фінансавым магчымасцям. Пры планаванні бюджэту на святы будзьце падрыхтаваныя да таго, што некаторыя з іх могуць запатрабаваць больш выдаткаў, чым вы чакалі. Таму не забывайце ўлічваць магчымыя непрадбачаныя расходы, такія як нечаканыя госці і дадатковыя падарункі.

 

Рыхтуем падарункі загадзя

 

Нават калі вы не з’яўляецеся віноўнікам урачыстасці і не будзеце сустракаць гасцей, заказваць кафэ або рэстаран, усё роўна вялікім пунктам расходаў на святы застаюцца падарункі. Расходы на падарункі неабходна планаваць наперад, і адкладаць сродкі на іх таксама трэба загадзя. Асабліва гэта тычыцца такіх «народных» святаў, як Новы год, Дзень абаронцаў Айчыны і 8 Сакавіка, бо тады трэба прыгатаваць не адзін падарунак, а адразу шмат прэзентаў. Купляючы падарункі загадзя, вы раўнамерна размяркоўваеце свае расходы і пазбягаеце рызыкі пераплаціць.

 

Напрыклад, каб адным махам не спустошыць свой бюджэт, купляючы ў снежні падарункі да Новага года, лепш размеркаваць гэтыя траты па часе. Калі вы сапраўды ведаеце ўжо летам, што марыць ваша дзіця ўбачыць пад елкай, разумна будзе набыць гэты падарунак загадзя. Да таго ж, вы атрымаеце выгаду, скарыстаўшыся сезоннымі зніжкамі або распродажам у «Чорную пятніцу», а таксама пазбегнеце ажыятажу і праблем з дастаўкай, якія непазбежна ўзнікаюць прама перад святамі. У сям’і ці калектыве можна весці спісы пажаданых падарункаў або, наадварот, спісы рэчаў, якія дакладна не хочацца атрымліваць у падарунак.

 

І памятайце, што сапраўдны святочны настрой залежыць не ад грашовых сродкаў, якія выдаткаваны на свята, а ад тых людзей, якія з намі побач!

 

Стварэнне бюджэту на святы і нашы невялікія лайфхакі дапамогуць вам кантраляваць расходы, пазбегнуць фінансавых цяжкасцяў і атрымліваць асалоду ад святочных дзён без лішніх клопатаў.